Scho früech hani gmerkt, dass mir ds Choche grossi Freud macht. Neui Sache usprobiere, Ideene umsetze oder o nacheme Rezäpt choche.
Gärn bi ig aube amene Kolleg bi sine Catering’s ga häufe u ha so viu Erfahrig i däm Berich dörfe sammle.
Ds Choche ohni Chochherd u ohni Bachofe, dusse ir Natur het mi geng wie meh fasziniert. Dür unzähligi Videos u Teschtdurchgäng ha ig mir Wüsse agschafft. Choche im Chessu, schmore im Dutch Oven, brätle ufem Grill, gare am Flammbrätt oder o niedergare / smoke ufeme säuber kreierte Grill isch mini Wäut.
Gli inisch ha ig gmerkt, dass ig das gärn o für Gsellschafte aus witers Hobby wet abiete. Sitem 2020 bi ig mit mire mobile Chuchi as paar mau im Jahr ungerwägs. Sig es wiedercheerendi Aläss oder öpis ganz Neus – ig fröie mi für öich dörfe z’choche.